कालीकोट- मोटरसाईकल दुर्घटनामा गम्भीर घाइते भएका समाजसेवी धनकृष्ण पाण्डेको मृत्यु भएको छ । खाँडाचक्र–३ ताडी बस पार्कबाट भौरुकुनास्थित घर जाने क्रममा आइतबार राति पाण्डे दुर्घटनामा परेका हुन् ।
कर्णाली प्रदेश ०२००२ प ५८७६ नम्बरको मोटरसाइकल दुर्घटनामा परी गम्भीर घाइते भएका ४० वर्षीय पाण्डेकाे कालीकोट जिल्ला अस्पतालमा उपचार हुन नसकेपछि सुर्खेत लैजाने क्रममा दैलेखको पाल्ताडामा सोमबार बिहान ४ बजे मृत्यु भएको प्रहरीले जनाएको छ ।
बसपार्कबाट उकालो क्याम्पस रोड हुँदै घर जाने क्रममा मोटर साइकल दुर्घटना भएको जिल्ला प्रहरी कार्यालय कालीकाेटका प्रमुख डिएसपी टेक बहादुर रावतले बताउनु भयाे । राति भीरबाट मोटरसाइकल अनियन्त्रित भएर खसेको उनको भनाइ छ ।
मोटरसाइकल सहित उनी सडकबाट ६ सय मिटर तल सडकमा खसेका थिए । टाउकोमा गम्भीर चोट लागेर घाइते भएका पाण्डेलाई सुर्खेत रेफर गरिएकोमा बाटैमा निधन भएको हो । उनी खाँडाचक्र ३ ताडी बजार व्यवस्थापन समिति र पाल्तमहादेव सामुदायिक वन उपभोक्ता समितिका अध्यक्षसमेत हुन् ।
