कालीकोट– बैकिंग सेवाको पहुचबाट टाढा रहेका नागरिकलाई लक्षित गरेर बित्तीय साक्षरता बढाउदै सहज सेवा प्रवाह गर्ने उद्देश्यले कालीकोटको सदरमुकाम मान्ममा प्रभु बैकको शाखा बिस्तार भएको छ । क वर्गको वाणिज्य बैकको रुपमा रहेको प्रभु बैकले ३०५ औं शाखाकोरुपमा मान्ममा आइतबारदेखि सेवा सुरु गरेको प्रबन्धक दिलिप उपाध्यायले बताउनु भयो ।
बैकको ब्यवसायिक संजाल विस्तार गर्दै देशभर शाखा कार्यालय संचालनमा ल्याएर सर्वसाधारणको घर आगनसम्म सरल र सहजरुपमा बैकिंग सेवा विस्तार गर्ने बैकले लक्ष्य लिएको छ । बैकले मान्म शाखामार्फत सर्वसाधारणलाई सेवा दिन सून्य लागतमा खाता संचालन गर्ने भएकोे छ ।
औपचारिक कार्यक्रम मार्फत केही समयपछि उद्घाटन गरिने बैकले आइतबार मान्म बजारका पण्डित जयचन्द्र अधिकारीबाट पूजा गरेर कामको सुरुवात गरेको ग्राहक तथा घरधनी खेमराज देवकोटाले बताए । उनको सुविधा सम्पन्न घरमा बैक बसेको छ ।
एक दशकअघिसम्म जिल्लाभर आर्थिक कारोबार गर्ने राष्ट्रिय वाणिज्य बैक मात्र रहेको कालीकोटमा सडक पहुचसगै संघीयतापछि सबै स्थानीय तह र सदरमुकाममा बैकका शाखा स्थापना भएका छन् । हाल कालीकोटमा राष्टिय वाणिज्य बैकका दुई, सानिमा बैकका दुई, ग्लोबल आइएमी बैकको दुई, नेपाल इन्भेष्टमेन्ट मेगा बैकको दुई, कृर्षि विकास बैकका चार, नबील बैकका दुई, एनआइसीको एक र प्रभु बैकको एक गरी १४ वटा बैकका शाखा संचालनमा छन् ।
