बिरेन्द्रनगर— कर्णाली प्रदेश सरकारको नेतृत्व आलोपालो गर्ने भएको छ । नेकपा एमाले र नेकपा माओवादी केन्द्रबीच नेतृत्व आलोपालो गर्ने सहमति भएको हो । पाँच वर्ष माओवादीले सरकारको नेतृत्व गर्ने केन्द्रमा शीर्ष नेताबीच सहमति भए पनि कर्णालीमा साढे दुई—दुई वर्ष मुख्यमन्त्री आलोपालो बन्नेमा समहमति भएको छ । प्रदेश सदस्य टेकराज पछाइका अनुसार सुरुमा माओवादी केन्द्र संसदीय दलका नेता राजकुमार शर्मा साढे दुई वर्ष नेतृत्व गर्ने र त्यसपछि एमाले संसदीय दलका नेता यमलाल कँडेलले नेतृत्व गर्ने गरी सहमति भएको बताइएको छ । बुधबार प्रदेश प्रमुख कार्यालयमा शर्माले मुख्यमन्त्रीको दाबी पेस गर्ने नेता पछाइले बताउनु भयो । प्रदेश प्रमुख तिलक परियारले मुख्यमन्त्रीमा दाबी पेस गर्न बुधबार साँझ ५ बजेको समय तोकेका छन् । कर्णाली प्रदेशमा कांग्रेसका १४, माओवादीका १३, एमालेका १० राष्ट्रिय प्रजातन्त्र पार्टी १, एकीकृत समाजवादीका १, र स्वतन्त्र सांसद १ गरी ४० सांसद रहेका छन् ।
