कालिकोट कालीकोटका २ सय ९४ वटा विद्यालयमा दिवाखाजाका लागि जाने बजेट शिक्षकको तलब भुक्तानीमै सकिने गरेको छ । कालीकोटमा एक सय विद्यालय शून्य दरबन्दीका छन् । एउटै दरबन्दी भएका विद्यालयमा निजी स्रोतका शिक्षक राख्नुपर्ने बाध्यताले दिवाखाजाको रकमले शिक्षकलाई तलवमा भुक्तानी गर्नु परेको छ । कालीकोटका ९ वटै स्थानीय तहका दिवा खाजामा एकरूपता छैन ।
अधिकांश विद्यालयले निजी स्रोतका शिक्षकको तलबमा खर्च गर्ने गरेका छन् भने दरबन्दी भएका विद्यालयले पनि नियमित खाजा खुवाउने गरेका छैनन् । कतिपयले भने नगद नै वितरण गर्ने गरेका छन् । सरकारले दलित छात्रवृत्ति, छात्रा छात्रवृत्ति, दिवा खाजाबापत बालबालिकाले प्रत्यक्ष पाउने रकम विद्यालय पठाउँछ । विद्यालयले दरबन्दी पूर्ति नभएको भन्दै पाठ्यपुस्तक र दिवा खाजाको रकम निजी स्रोतका शिक्षक पालनका लागि खर्च गरिरहेको छ ।
कालीकोटमा बर्सेनि झन्डै १५ करोड रुपैयाँ दिवा खाजाका लागि आउने गरेको शिक्षा विकास तथा समन्वय इकाइ प्रमुख चन्द्रप्रसाद अधिकारीको बताउनु भयो । अधिकांश विद्यालयले दिवा खाजाको रकम शिक्षकको तलबमा खर्च गरिरहेको उनले बताए ।
