अझै कालीकोटका छ वटा स्थानीय तह निमित्तको भरमा

कालीकोट– संघिय मामिला तथा सामान्य प्रशासन मन्त्रालयले कालीकोटका पाँच वटा स्थानीयतहमा अझै प्रमुख प्रशासकीय अधिकृत पठाउन सकेको छैन । मन्त्रालयले प्रमुख प्रशासकीय अधिकृत नपठाउँदा लामो समय देखि यहाँको खाँडाचक्र, तिलागुफा र रास्कोट नगरपालिका तथा सान्नीत्रिणेणी, शुभकालीका, महाबै गाउँपालिका निमित्तको भरमा चल्दै आएका छन् ।

स्थानीय सरकार संचालन ऐन २०७४ को दफा ८४ (४) मा भएको ब्यवस्था अनुसार मन्त्रालयले प्रमुख प्रशासकीय अधिकृत पठाउनु पर्ने हुन्छ । कतिपय स्थानीय तहले दरबन्दी अनुसार प्रमुख प्रशासकीय पाए पनि ती धेरै समय टिक्दैनन् भने कतिपय अहिलेसम्म निमित्तकै भरमा छन् ।

नौ वटा स्थानीय तह रहेको कालिकोटमा खाँडाचक्र नगरपालिकामा निमित्त प्रशासकीय अधिकृतको रूपमा प्रवलजंग शाही कार्यरत छन् । यसैगरी रास्कोट नगरपालिकामा जवान सिंह बम विगत तीन वर्षदेखि पालिकाको निमित्त प्रमुख प्रशासकीय अधिकृतका रूपमा छन् । बिचमा दुई पटक प्रमुख प्रशासकीय अधिकृत पठाइएको भए पनि उनीहरू टिक्न सकेनन् ।

शुभकालीका गाउँपालिकामा छैटौँ तहका गणेश बहादुर शाही निमित्त प्रमुख प्रशासकीय अधिकृत छन् । शाहीले गत पुसबाट निमित्तको जिम्मेवारी समालेका हुन् ।

महावै गाउँपालिकामा पनी छैटौँ तहका प्रकाश शाहीले एक महिनादेखि निमित्त प्रमुख प्रशासकीय अधिकृतको जिम्मेवारी पाएका हुन् । सान्नी त्रिवेणी गाउँपालिकाको निमित्त प्रमुख प्रशासकीय अधिकृतको रूपमा २०७६ सालदेखि नेत्र राज शाही कार्यरत रहेका छन् । उनी छैटौँ तहका कर्मचारी हुन् । गाउँपालिकामा प्रमुख प्रशासकीय अधिकृतको लागि आठौँ तहको दरबन्दी हुने ब्यवस्था छ । तर मन्त्रालयले भनसुनको आधारमा छैटौँ तहका कर्मचारीलाई प्रमुख प्रशासकीय अधिकृतको जिम्मेवारी दिएको छ । त्यस्तै तिलागुफामा पनि सातौं तहका लाल बहादुर मल्ल निमित्त छन् ।

रास्कोट र खाँडाचक्र नगरपालिकाले अहिलेसम्म दरबन्दी अनुसारको प्रशासनिक नेतृत्व पाएका छैन । कर्मचारीले दुर्गममा काम गर्न इच्छा नदेखाउने भएका कारण कालीकोटका धेरैजसो स्थानीय तहले दरबन्दी अनुसार कार्यालय प्रमुख पाउँदैनन् ।
यहाँको नरहरिनाथ गाउँपालिका, पलाँता गाउँपालिका र पचालझरना गाउँपालिकामा भने दरबन्दी अनुसारका प्रमुख प्रशासकीय अधिकृत कार्यरत छन् ।