कालीकोट– जिल्ला प्रशासन कार्यालय कालीकोटमा सेवाग्राहीको संख्या बढेपछि कार्य सम्पादन समय समेत बढेको छ । राष्ट्रिय परिचयपत्र र नागरिकता बनाउने सेवाग्राही बढेपछि बिहान ७ बजे देखि बेलुकी ७ बजे सम्म सेवा प्रवाह गर्नु परेकोे सहायक प्रमुख जिल्ला अधिकारी जनक शर्माले बताउनु भयो ।
भाद्र ३ गते मात्र २ सय जना सेवाग्राहीले सेवा लिएका छन् । जसमध्य १ सय ३० जनाले राष्ट्रिय परिचय पत्र दर्ता गराएका छन् । ४० जना सेवाग्राहीले नागरिकता प्रतिलिपी लिएका छन् भने ३० जनाले अन्य सेवा लिएका छन् । जिल्ला प्रशासन कार्यालय कालीकोटले साउन महिनामा २ हजार ८ सय ४२ सेवाग्राहीलाई सेवाप्रवाह गरेको छ ।
