हुम्लामा रैथाने बालीकाे समर्थन मुल्य निर्धारण

कालीकाेट- हुम्ला जिल्लामा उत्पादन हुने रैथाने बालीको मूल्य निर्धारण गरिएको छ । साेमबार बसेकाे जिल्ला प्राथमिक खरिद समितिको बैठकले चालु आर्थिक वर्षका लागि सातवटा रैथाने बालीको मूल्य निर्धारण गरेको हाे ।

नयाँ मूल्यअनुसार सिमी प्रतिकेजी १७०, चिनोको चामल प्रतिकेजी १८०, कागुनोको चामल प्रतिकेजी १८०, तिते फापर प्रतिकेजी १००, मिठे फापर प्रतिकेजी १२०, उवा प्रतिकेजी १२० र कोदो प्रतिकेजी १०० रुपैयाँ निर्धारण गरिएको छ ।

चिनो, कागुनो र तिते फापरको मूल्य अघिल्लो वर्षको तुलनामा पाँच रुपैयाँले बढाइएको छ ।  सिमीमा प्रतिकेजी १० रुपैया बढाइएको छ । सबै रैथाने बाली खाद्य व्यवस्था तथा व्यापार कम्पनी लिमिटेडले गाउँपालिकासँग सम्झौता गरेर खरिद गर्नेछ । हुम्लामा आधिकारिक रुपमा रैथाने बालीको मूल्य निर्धारण गर्न सुरु गरिएको यो तेस्रो वर्ष हो ।