मान्म- कालीकोटको पचालझरना नेपालको मात्र नभइ एसिया कै सबैभन्दा अग्लो झरना भएको दाबी गरिएको छ । झरना ३८१ मिटर अग्लाे रहेको गाउँपालिकाका अध्यक्ष देवराज शाहीले बताउनु भयाे ।
नेपालको सबैभन्दा अग्लो भनिएको तेह्रथुमको हृयातुङ झरनाको उचाई ३६५ मिटर मात्र छ । तर, हृयातुङ भन्दा पचाल झरनाको उचाई १६ मिटर बढी अग्लो रहेको छ। गाउँपालिकाले गरेकाे मापन अनुसार यो झरना विश्वकै ३० अग्ला झरनाहरुमा परेको छ । झरनाकै नाम बाट गाउँपालिकाको नाम राखिएकाे हाे ।
यो झरना अहिलेसम्म नेपाल पर्यटन बोर्डमा समेत सूचिकृत भएको छैन । अब झरनाको वास्तविक उचाई समेत पत्ता लागेकाले यसलाई नेपाल पर्यटन बोर्डमा सूचिकृत गराउनका लागि प्रकृया सुरु गर्ने गाउँपालिका अध्यक्ष शाहीले बताए ।
यसअघि स्थानीयले समिति बनाएर संरक्षणको काम गरिरहेकाे र औपचारिक रुपमा सूचिकृत गराउन प्रकृया सुरु गरिएकाे अध्यक्षले बताउनु भयाे ।गाउँपालिकाले झरनासम्म पुग्नका लागि बाटो, बसोबासको व्यवस्था मिलाएर पर्यटकीय क्षेत्रका रुपमा विकास गर्ने लक्षका साथ योजना तथा कार्यक्रम अघि बढाएको छ । पचालझरना घुम्नका लागि असार पहिलो हप्ता देखि असोज अन्तीम सम्मको समय प्रभावकारी मानिन्छ ।
