कालीकोट– पाँच दिन देखि अवरुद्ध भएको कर्णाली राजमार्ग आजबाट पुर्णरुपमा सूचारु भएको छ । बर्षाका कारण पहिरो संगै आएको बाढीले बुधबारबाट अवरुद्ध भएको कर्णाली राजमार्ग पहिरो हटाएपछि सडक पुर्ण रुपमा संचालनमा आएको हो । सडक संचालनमा आएपछि बाटोमा रोकिएका यातायातका साधनहरु गन्तब्य तिर लागेका छन् ।
अवरुद्ध सडक खुलेपछि ताडी बसपार्कमा रोकेर राखिएका गाडीहरु छोडीएको कालीकोटका प्रमुख जिल्ला अधिकारी गणेश नेपालीले बताउनु भयो । हिजो आइतबार प्रमुख जिल्ला अधिकारी गणेश नेपाली, डिएसपी अर्जुन केसी, सशत्र प्रहरी बल कालीकोट डिएसपी दिपेन्द्रराज बिष्ट, पत्रकार लगायतका सरोकारवालाहरुले राजमार्गको अनुगमन गरि फर्किनु भएको छ ।
कालीकोट खण्डको हुल्म, एसमोड, गगनेखोला, दैखोला, दैलेख खण्डको दैखोला, मालाचौर र किटु भिरको पहिरो सडक डिभिजन कार्यालय जुम्ला, जिल्ला प्रशासन कार्यालय कालीकोट, जिल्ला प्रशासन कार्यालय, दैलेख, नेपाल प्रहरी र स्थानीयको सहयोगमा सडकमा आएको पहिरो हटाइएको जिल्ला प्रहरी कार्यालय कालीकोटले जनाएकोे छ । बर्षाको समयमा बाटोको अवस्था बुझेर मात्र यात्रा गर्न जिल्ला प्रशासन कार्यालय कालीकोटले आम नागरिकलाई अनुरोध गरेको छ ।
