कर्णाली नदीमा जीप खस्यो

कालीकोट–हुम्लाको सिमकोटबाट हिल्सा जाँदै गरेको जिप कर्णाली नदीमा खसेको छ । कर्णाली प्रदेश ०३–१–०२२ च ५१२६ नम्बरको बलेरो जिप उकालो चढ्दै गर्दा च्याछहरा भिरबाट कर्णाली नदीमा खसेको हो । दुर्घटनामा घाइते भएका चालकको उपचारको क्रममा जिल्ला अस्पतालमा मृत्यु भएको हुम्लामा मृत्यु भएको छ ।
जनकपुर घर भएका चालक राजेशहेमजंग तामाङको उपचारको क्रममा मृत्यु भएको हुम्लाका प्रहरी प्रमुख डीएसपी भीमलाल भट्टराईले बताउनु भयो । जिप भिरबाट खस्दा हाम फालेका उनी सिकिस्त घाइते भएका थिए । दुर्घटना अघि अफ्ठ्यारो उकालो सडक भएकाले उनले जिपका यात्रुलाई भने ओरालेका थिए ।

कामका लागि चीनको ताक्लाकोट जान सीमा पास बनाउन सदरमुकाम सिमकोट आएका लिमीका १२ जना यात्रु बोकेर उक्त जिप हिल्सा जाँदै थियो ।
सामान सहित भिरबाट ५० मिटर तल कर्णाली नदीमा खसेको जिप डुबेर बेपत्ता भएको छ । बेपत्ता भएको जीपको प्रहरी र स्थानीय बासीले खोजी गरिरहेको प्रहरीले जनाएको छ ।
सोमबार बिहान ५ बजे सिमकोटबाट हिल्साका लागि हिँडेको जिप बिहान करिब ७ बजे उक्त भिरबाट खसेको प्रहरीले जनाएको छ ।